Փաստաթղթեր
Օգտագործման պայմաններ։
Այս պայմանները Marcelan HR ծրագրից օգտվելու կանոններն են։ Դրանք «Նումետրիքս» ՍՊԸ-ի (այսուհետ՝ «մենք») հրապարակային առաջարկն են (օֆերտա)՝ բաժանորդագրության պայմանագիր կնքելու համար։
Կարևոր է. Marcelan HR-ը գործիք է, որով բաժանորդը ինքն է վարում իր կադրային գործերը։ Կադրային գործերի (տվյալներ, փաստաթղթեր, ժամկետներ, օրենքի պահանջներ) համար ամբողջ պատասխանատվությունը բաժանորդինն է. «Նումետրիքս» ՍՊԸ-ն դրանց համար պատասխանատվություն չի կրում (10-րդ բաժին)։
1. Հիմնական հասկացություններ
- Ծառայություն՝ Marcelan HR ծրագիրը (կադրային փաստաթղթեր, կադրային հաշվառում, հաշվետվություններ), որը հասանելի է ինտերնետով՝ բրաուզերում։
- Բաժանորդ՝ իրավաբանական անձ, անհատ ձեռնարկատեր կամ ֆիզիկական անձ, ով Marcelan-ում ստեղծել է ընկերության հաշիվ։
- Օգտատեր՝ անձ, ում բաժանորդը տվել է ծառայությունից օգտվելու հասանելիություն։
- Ադմին՝ բաժանորդի օգտատեր, ով կառավարում է օգտատերերին, կարգավորումները և միացումները (Google Drive, էլ. փոստ)։
- Կազմակերպություն՝ ընկերություն, մասնաճյուղ կամ ԱՁ, որի կադրային գործերը վարվում են բաժանորդի հաշվում։
- Սակագին՝ բաժանորդագրության տարբերակը, որը սահմանում է օգտատերերի և կազմակերպությունների առավելագույն քանակը։
2. Պայմանագրի կնքումը
- Գրանցվելով՝ Դուք ընդունում եք այս պայմանները անվճար փորձաշրջանի համար։ Բաժանորդագրության վճարը կատարելով՝ ընդունում եք դրանք ամբողջությամբ, և պայմանագիրը համարվում է կնքված։
- Ընկերության անունից գրանցվելով՝ հաստատում եք, որ իրավասու եք դա անել։
- Ձեր դիմումով նույն պայմաններով կնքում ենք նաև գրավոր պայմանագիր։
3. Ծառայությունը
- Marcelan HR-ը կազմում է կադրային փաստաթղթեր ՀՀ աշխատանքային օրենսգրքով, վարում է կադրային հաշվառում և կազմում է հաշվետվություններ և ֆայլեր ՊԵԿ-ի համար։ Հնարավորությունները նկարագրված են գլխավոր էջում։
- Ծառայությունը աշխատում է բրաուզերում, տեղադրում պետք չէ։ Թարմացումները հասանելի են դառնում ինքնաբերաբար։
- Ծառայությունը զարգացնում ենք. կարող ենք ավելացնել, փոխել կամ հանել հնարավորություններ՝ պահպանելով հիմնական գործառույթները (փաստաթղթեր, աշխատակիցների տվյալներ, հաշվետվություններ)։
- Marcelan HR-ը աշխատավարձ չի հաշվարկում և հաշվապահական ծրագրին չի փոխարինում։
4. Հաշիվ և օգտատերեր
- Գրանցման տվյալները պետք է լինեն ճիշտ։ Ամեն օգտատեր մտնում է իր անունով, և մուտքի տվյալները ուրիշին չեն փոխանցվում։
- Ադմինը որոշում է, թե ով ինչ դերով և որ կազմակերպություններին ունի հասանելիություն, և պատասխանատու է այդ որոշումների համար։
- Ձեր հաշվով կատարված գործողությունները համարվում են Ձեր կատարածը։ Եթե կասկածում եք, որ մուտքի տվյալները հայտնի են դարձել ուրիշին, փոխեք գաղտնաբառը և տեղեկացրեք մեզ։
5. Անվճար փորձաշրջան
- Գրանցվելուց հետո 14 օր ծառայությունն անվճար է՝ մինչև 5 օգտատեր և 10 կազմակերպություն։ Քարտ կամ վճարում պետք չէ։
- Փորձաշրջանի ավարտից հետո, մինչև վճարումը, տվյալները հասանելի են միայն դիտելու համար։ Վճարելուց հետո աշխատանքը շարունակվում է նույն տվյալներով։
6. Սակագներ և վճարում
Սակագները՝ 25/10/2026-ի դրությամբ.
| Սակագին | Օգտատեր | Կազմակերպություն | Ամսական | Տարեկան |
|---|---|---|---|---|
| Սինգլ | մինչև 1 | մինչև 10 | 15 000 ֏ | 150 000 ֏ |
| Ստանդարտ | մինչև 3 | մինչև 15 | 25 000 ֏ | 250 000 ֏ |
| Ստանդարտ+ | մինչև 9 | մինչև 20 | 35 000 ֏ | 350 000 ֏ |
| Մաստեր | մինչև 20 | մինչև 50 | 45 000 ֏ | 450 000 ֏ |
| Պրո | մինչև 30 | մինչև 100 | 95 000 ֏ | 950 000 ֏ |
- Գները ներառում են ԱԱՀ։
- Յուրաքանչյուր լրացուցիչ կազմակերպություն՝ +5 000 ֏, օգտատեր՝ +3 000 ֏ ամսական։
- Տարեկան փաթեթը վճարվում է 10 ամսվա գնով։
- Գնի մեջ ներառված է մեկ առցանց ուսուցում յուրաքանչյուր օգտատիրոջ համար։
- Վճարումը կատարվում է նախապես՝ ամբողջ ժամանակահատվածի (ամիս կամ տարի) համար, քարտով՝ բանկի վճարման էջում, կամ բանկային փոխանցումով։ Վճարման նշումում գրեք ընկերության անվանումը և ՀՎՀՀ-ն։
- Բաժանորդագրությունը միացնում ենք վճարումը ստանալուց հետո՝ սովորաբար նույն կամ հաջորդ աշխատանքային օրը։ Վճարված ժամանակահատվածը սկսվում է միացման օրը։
- Վճարման համար տրամադրում ենք հաշիվ՝ ՀՀ օրենսդրությամբ սահմանված կարգով։
- Գները կարող ենք փոխել։ Նոր գները գործում են հաջորդ ժամանակահատվածից, իսկ արդեն վճարվածի գինը չի փոխվում։ Գների բարձրացման մասին տեղեկացնում ենք առնվազն 30 օր առաջ։
7. Ժամկետը և դադարեցումը
- Բաժանորդագրությունն ինքնաբերաբար չի երկարաձգվում, և գումար ինքնաբերաբար չի գանձվում։ Շարունակելու համար վճարում եք հաջորդ ժամանակահատվածի համար։
- Ժամկետի ավարտից հետո տվյալները մնում են դիտելու համար։ Վճարելուց հետո աշխատանքը շարունակվում է նույն տեղից։
- Կարող եք դադարեցնել ցանկացած պահի՝ չվճարելով հաջորդ ժամանակահատվածի համար։ Տվյալները ջնջելու համար գրեք մեզ (Գաղտնիության քաղաքականություն, 7)։
- 11-րդ բաժնի կանոնները խախտելու դեպքում կարող ենք կասեցնել հաշիվը՝ նախապես տեղեկացնելով, բացի այն դեպքերից, երբ անհապաղ կասեցումն անհրաժեշտ է անվտանգության համար։
8. Վճարի վերադարձ
- Անվճար փորձաշրջանը թույլ է տալիս ստուգել ծառայությունը մինչև վճարելը։
- Վճարված ժամանակահատվածի վճարը չի վերադարձվում, բացի այն դեպքերից, երբ ծառայությունը մեր մեղքով չի մատուցվել կամ վճարը կատարվել է սխալմամբ (օրինակ՝ կրկնակի)։ Այդ դեպքում գումարը վերադարձնում ենք 10 աշխատանքային օրվա ընթացքում՝ այն եղանակով, որով վճարվել է։
9. Տվյալներ
- Ծառայությունում լրացված տվյալները և կազմված փաստաթղթերը պատկանում են բաժանորդին։ Մենք դրանք մշակում ենք միայն ծառայությունը մատուցելու համար՝ բաժանորդի անունից և Գաղտնիության քաղաքականության համաձայն, որը այս պայմանների մասն է։
- Բաժանորդը պատասխանատու է տվյալների ճշտության և դրանք մշակելու իրավական հիմքի համար։
- Փաստաթղթերը կարող եք ներբեռնել PDF-ով և Word-ով, ցուցակները՝ Excel-ով։ Google Drive-ը միացնելիս PDF-ները պահվում են նաև Ձեր Drive-ում։
- Տվյալների բազայի պատճենը արվում է ամեն օր։ Կարևոր փաստաթղթերը խորհուրդ ենք տալիս պահել նաև Ձեզ մոտ։
10. Կադրային գործերի պատասխանատվությունը
Marcelan HR-ը գործիք է, որով բաժանորդը ինքն է վարում իր և իր սպասարկած կազմակերպությունների կադրային գործերը։ «Նումետրիքս» ՍՊԸ-ն այդ կադրային գործերը չի վարում և դրանց համար որևէ պատասխանատվություն չի կրում։ Ամբողջ պատասխանատվությունը բաժանորդինն է, այդ թվում՝
- ծրագրում լրացված տվյալների ճշտության և ամբողջականության համար;
- կազմված փաստաթղթերի (պայմանագրեր, հրամաններ, համաձայնագրեր, ծանուցումներ, տեղեկանքներ, տաբելներ, հաշվետվություններ և այլն) բովանդակության, ստորագրման, ժամկետների և կիրառման համար;
- ՀՀ աշխատանքային և այլ օրենսդրության պահանջների կատարման համար;
- պետական մարմիններին (ՊԵԿ, Վիճակագրական կոմիտե և այլն) ներկայացվող տեղեկությունների, ֆայլերի և ժամկետների համար;
- աշխատողների և այլ անձանց պահանջների, աշխատանքային վեճերի, տուգանքների, տույժերի և այլ հետևանքների համար։
- Ձևանմուշները կազմված են ՀՀ աշխատանքային օրենսգրքի և այլ իրավական ակտերի հիման վրա և թարմացվում են դրանց փոփոխություններին համապատասխան։ Բաժանորդը ամեն փաստաթուղթ ստուգում է ստորագրելուց կամ ներկայացնելուց առաջ։
- Ծրագրի հաշվարկները (օրինակ՝ արձակուրդի մնացորդ, աշխատավարձի հաշվիչ, գործուղման նորմեր) օժանդակ են և չեն փոխարինում մասնագետի ստուգմանը։
- Marcelan-ը իրավաբանական կամ հաշվապահական խորհրդատվություն չէ։ Անհրաժեշտության դեպքում դիմեք մասնագետի։
- Եթե «Նումետրիքս» ՍՊԸ-ն առանձին պայմանագրով մատուցում է կադրային կամ հաշվապահական ծառայություններ, պատասխանատվությունը որոշվում է այդ պայմանագրով։
11. Օգտագործման կանոններ
Արգելվում է՝
- ծառայությունն օգտագործել օրենքին հակասող նպատակներով կամ ուրիշի տվյալները մշակել առանց իրավական հիմքի;
- փորձել մուտք գործել այլ բաժանորդների տվյալներ կամ շրջանցել սակագնի սահմանաչափերը;
- խաթարել ծառայության աշխատանքը՝ ծանրաբեռնել, վնասակար ծրագրեր տարածել, ավտոմատ զանգվածային հարցումներ անել;
- ծառայությունը կամ դրա մասերը վաճառել, վարձով տալ կամ պատճենել՝ առանց մեր գրավոր համաձայնության։
12. Հասանելիություն և աջակցություն
- Ձգտում ենք, որ ծառայությունը հասանելի լինի շուրջօրյա։ Պլանային աշխատանքները կատարում ենք հնարավորինս ոչ աշխատանքային ժամերին և նախապես տեղեկացնում։
- Ծառայությունը աշխատում է Google Cloud-ի վրա։ Երրորդ անձանց (Google, բանկեր, էլ. փոստի ծառայություններ, ինտերնետ մատակարարներ) խափանումները կարող են ազդել դրա աշխատանքի վրա։
- Աջակցություն՝ էլ. փոստով և հեռախոսով, աշխատանքային օրերին։
- Ուսուցումը՝ առցանց, յուրաքանչյուր օգտատիրոջ համար մեկ անգամ, պայմանավորված ժամին։
13. Պատասխանատվություն
- Ծառայությունը մատուցում ենք բարեխղճորեն և մասնագիտական հոգածությամբ։
- Կադրային գործերի համար պատասխանատվություն չենք կրում (10-րդ բաժին)։
- Մենք պատասխանատու չենք անուղղակի վնասների և բաց թողնված օգուտի համար։
- Եթե ծառայությունը մեր մեղքով չի մատուցվել (օրինակ՝ ծրագիրը երկար ժամանակ չի աշխատել), մեր պատասխանատվությունը սահմանափակվում է վերջին 12 ամսում բաժանորդի վճարած գումարով։ Այս սահմանափակումը չի գործում դիտավորության դեպքում։
- Անհաղթահարելի ուժի (ֆորս-մաժոր) դեպքում կողմերն ազատվում են պատասխանատվությունից դրա ողջ ընթացքում։
14. Մտավոր սեփականություն
- Marcelan ծրագրերը, ձևանմուշները, դիզայնը, Marcelan անվանումը և լոգոն պատկանում են «Նումետրիքս» ՍՊԸ-ին։
- Բաժանորդագրության ընթացքում բաժանորդը ստանում է ծառայությունից օգտվելու ոչ բացառիկ իրավունք՝ իր սակագնի սահմաններում։
- Ծառայությունում կազմված փաստաթղթերը բաժանորդը ազատ օգտագործում է իր աշխատանքում։
15. Պայմանների փոփոխություն
- Պայմանների նոր տարբերակը հրապարակվում է այս էջում՝ ուժի մեջ մտնելու օրով։ Էական փոփոխությունների մասին բաժանորդներին տեղեկացնում ենք էլ. փոստով՝ առնվազն 10 օր առաջ։
- Եթե համաձայն չեք նոր պայմաններին, կարող եք դադարեցնել բաժանորդագրությունը. արդեն վճարված ժամանակահատվածը շարունակվում է նախկին պայմաններով։
16. Կիրառելի իրավունք և վեճեր
- Այս պայմանների նկատմամբ կիրառվում է ՀՀ օրենսդրությունը։
- Վեճերը լուծում ենք բանակցություններով, իսկ համաձայնության չգալու դեպքում՝ ՀՀ դատարանում։
17. Մեր տվյալները
«Նումետրիքս» ՍՊԸ
Իրավաբանական հասցե՝ ՀՀ, ք. Երևան, Գագարինի 32
Գրասենյակ՝ ՀՀ, ք. Երևան, Արշակունյաց 59
Հեռախոս՝ +374 41 903209
Էլ. փոստ՝ info@numetrix.am